പറവൂർ: നഗരസഭ ആറാം വാർഡ് പല്ലംതുരുത്ത് റോഡിൽ പ്രവർത്തിക്കുന്ന ബീവറേജസ് കോർപറേഷന്റെ മദ്യശാല മാറ്റി സ്ഥാപിക്കണമെന്ന് ഹൈക്കോടതിയുടെ ഉത്തരവ്. മദ്യശാല ഇപ്പോൾ പ്രവർത്തിക്കുന്ന സ്ഥലത്തു നിന്ന് മറ്റൊരു സ്ഥലത്തേക്ക് മൂന്ന് മാസത്തിനുള്ളിൽ മാറ്റിസ്ഥാപിക്കാൻ ഹൈക്കോടതി എക്സൈസ് കമ്മീഷണർക്കും ബീവറേജസ് കോർപറേഷനും നിർദേശം നൽകി. ഉത്തരവ് നടപ്പിലാക്കി കോടതിയെ അറിയിക്കുകയും വേണം.
വാർഡ് കൗൺസിലറും ജനകീയ അവകാശ സംരക്ഷണ സമിതി ജനറൽ കൺവീനറുമായ രഞ്ജിത്ത് മോഹൻ സമർപ്പിച്ച പരാതിയിലാണ് ഉത്തരവ്. വർഷങ്ങളായി മദ്യശാല മൂലം ദുരിതമനുഭവിക്കുന്ന നാല് റസിഡന്റ്സ് അസോസിയേഷനുകളുടെ സഹകരണത്തോടെയാണ് ജനകീയ അവകാശ സംരക്ഷണ സമിതി രൂപീകരിച്ചത്.
സമിതിയുടെ നേതൃത്വത്തിൽ നിരവധി പ്രക്ഷോഭങ്ങൾ നടത്തി. മദ്യശാല മാറ്റിസ്ഥാപിക്കണമെന്ന് നഗരസഭ പ്രമേയം പാസാക്കുകയും ചെയ്തു .എന്നിട്ടും സർക്കാർ അനങ്ങാത്തതിനെത്തുടർന്നാണ് രഞ്ജിത്ത് മോഹൻ ഹൈക്കോടതിയെ സമീപിച്ചത്. പരാതിക്കാർക്ക് വേണ്ടി മുൻ അഡീഷണൽ അഡ്വ. ജനറൽ കെ. എ. ജലീൽ ഹാജരായി.
